جیزما قارا

Qap-qara qan

Daha qonşuda sevişən,

Qadınla kişinin sevişmək səsinə

qulaq asmayacam…!

Bir neçə paltar sabını alıb,

Çirkin yazılarımı yuyub

Həyətimizdəki ipdən asacam.

Günəşin şüalarında quruyandan sonra,

Ütülü paltar geydirəcəm yazılarıma…!

ərşənin quru bəylərinə bənzəyən yazılarım

nə sağa baxacaqlar…

nə sola…

 dik – dik baxıb…

dümdüz yeriyəcəklər…!

Evdəki istəkanların,

Çirkin həyatına son qoyum deyə,

Bir – bir qonşunun divarına çırpib

Hamısını sındıracam…!

Qulağıma pambıq təpib,

Qadağan olunmuş heç bir səsin

Həvəsində qalmayacam…!

Xəş salacam içimə…!

Beynimdə fırlanan ferkanslara,

Parazet buraxacam.

Misralarımın qıçını sındırıb,

Qoltuğuna çəlik verəcəm…!

Bundan belə söz verirəm…

Gözlərimi giro qoyuram

Şerlərim çılpaq olmayacaq…!

Ya ərəb çarşabı geyindirəcəm

Yada kı fransız kotşalvarı…!

Sayın oxucular!

Ağ-apbaq qanıma baxmayın!

Qanımı şüşəyə tutsaz,

Qap-qara qan görəcəksiniz…!

قاپ- قارا قان

داها قونشودا سئويشن،

قادينلا کيشي­نين سئويشمک سسينه

قولاق آسماياجام…!

بير نئچه پالتار صابيني آليب،

چيرکين يازيلاريمي يويوب

حَيَطيميزده کي  ايپدن آساجام.

گونشين شوعالاريندا قوروياندان سونرا،

اوتولو پالتار گئيديرجم يازيلاريما…!

ارشه­نين قورو بي­لرينه بنزه­ين يازيلاريم

نه ساغا باخاجاقلار…

نه سولا…

ديک - ديک باخيب…

دومدوز يئرييه­جکلر…!

ائوده­کي  ايستکانلارين،

چيرکين حياتينا سون قويوم دئيه،

بير - بير قونشونون ديوارينا چيرپيب

هاميسيني سينديراجام…!

قولاغيما پامبيق تپيب،

قاداغان اولونموش هئچ بير سسين

هوسينده قالماياجام…!

خش سالاجام ايچيمه…!

بئينيمده فيرلانان فئرکانسلارا،

پارازئت بوراخاجام.

ميصراعلاريمين قيچيني سينديريب،

قولتوغونا چليک وئره­جم…!

بوندان بئله سؤز وئريرم…

گؤزلريمي گيرو قويورام…

شعرلريم چيلپاق اولماياجاق…!

يا عرب چارشابي گئيينديره­جم

يادا کي فرانسيز کوت ـ ­شالواري…!

سايين اوخوجولار!

آغ - آپباق قانيما باخمايين!

قانيمي شوشه­يه توتساز،

قاپ - قارا قان گؤره­جکسينيز…!

İlanımın məsum olduğuna…!

Bir az dərindən baxın mənə

Məcmeyi cırıram…!

Özümü sıxıb, sıxılıram

Barmaqlarımı bir – birinə qıfıllayıb,

Qızarıb, bozarıram…!

Zəncir qırıram…!

Zəncirlənmiş məsum meymunumun,

Oyunlarını izləyəndən sonra…!

Bir – neçə nəfər igid istəyirəm

Mis kasamı doldursun…

Yenə də başlayım oyunuma

İndi zəhərli ilanı qutudan çıxardacam…!;

Gözlərinizə iztirab dolmasın!

Heç nədən qorxmayın!

Diskinməyin!

Yaxına gəlin…!

Hamınız şahid olacaqsınız,

Vəhşı ilanımın məsum olduğuna…!

ایلانیمین معصوم اولدوغونا…!

بیر آز دریندن باخین منه…

مجمئیی جیریرام…!

اؤزومو سیخیب، سیخیلیرام

بارماقلاریمی بیر - بیرینه قیفیللاییب،

قیزاریب، بوزاریرام…!

زنجیر قیریرام…!

زنجیرلنمیش

معصوم مئیمونومون،

اویونلارینی دا ایزله­یندن سونرا،

 بیر - نئچه نفر ایگید ایسته­ییرم

میس کاسامی دولدورسون…،

یئنه ده باشلاییم اویونوما…!

ایندی زهرلی ایلانی قوتودان چیخارداجام؛

گؤزلرینیزه ایضطیراب دولماسین!

هئچ ندن قورخمایین!

دیسکینمه­یین!

یاخینا گلین…!

هامینیز شاهید اولاجاقسینیز،

وحشی ایلانیمین معصوم اولدوغونا…!

دارتیشمادان دارتیشمالار (6)

:: شاعیرلرین آراسیندا بیر پیس عادت وار

«بورادا گئدن یازینی وورماق ایسته میردیم آمما دوستوموزون چوخ تأکیدی ایله اونو بورادا وورورام تا بابک قوجا اوغلو دوستوموز دئمیشکن بیرله ایکینین اوچ اولماسینی بیلمه ین خالقیمیز نظر وئرسین…!»

بابک قوجا اوغلو:

حورمتلی رامین جهانگیر زاده !

سالام لار . دوست لارین بیرینین توسطی ایله سیزین بو یازینیزدان آگاه لانیب اونلاری چوخلو تعدادینین ( تخمینا 20 نفر ) مندن سیزه جاواب یازمالاری خواهش لرینی یئرینه یئتیریب دئیه بو نئجه قابل سیز سطیرلری بیر یولداش کیمی سیزه سونورام :

- منجه بیر بالاجا شعر اوسته بو قدر مباحثه آپارماق اولا وقتی اولدورمک ساییلیر و اوندان سونرا دا شعری مجازی اوستونلویه ساری اپاریر

- آنجاق بو یازیلار ایستر منیم کی ایستر باشقالاری و ایستر ساوالان قیزی کی منیم او جنابا چوخلو حورمتیم وار یالنیز و یالنیز سیزین صلاحینیزا گوره دی کی سیزی سئودیییمیز اوچون بونلاری دئییریک . سیز اولا بیلر کی هئچ قبول ائتمه یه سینیز و بعضی گنج شاعیرلریمیز کیمی بالا بالا آرادان گوتوروله سیز .

- بیز نه یازیریق سا اونجاه ده خالقیمیزی نظرده آلمالیییق . منجه مدرن ، پست مدرن و بئله بئله سوزلر ایندی لیک ساده جه بوش سوزلر دیر . بیزیم خالقیمیز بیر له ایکینین اوچ اولماسینی بیلمه دن سیز اونا هندسه مثاللاری آچیقلاماق ایستیرسیز ؟ البته اونسوزدا یازیرسیز ولی بو یازیلار یالنیز نئچه نفرین الینده اوخونور . سیزی نه خالق یاشادیر نه ده تاریخ . سیز دئدیییم شخص رامین دئییل ها .

- شاعیرلرین آراسیندا بیر پیس عادت وار اودا بودور کی او زامان کی اوجا چاتیر لار یا ائله سئویلیرلر تئز اونو زیبیله قویورلار . یادیما گلیر نئچه ایللر قاباق حسن اومود اوغلو بیزیم چوخ عزیز قارداشیمیز سیزین هله او زامان ال رسیم لرینیزی و شعرلرینیزی بیزیم ائوه گتیرمیشدی و منه دئییردی کی بو فلان کس دیر و اوشاقلارا یاخشی فعالیت ائله مک ایستیر و سیزی ده تشویق ائله مه یه باشلامیشدیر . انجاق او گوزل دونیانیز هارا بو چیرکین یازیلار هارا .

- سیز ادعانیز وار کی بو یازیلار اوخوجویا یازیرسیز . زحمت اولماسا بونو وئرین ائوینیزده باجینیز ، آنانیز یا حتی خود آتانیز اوخوسون . سونرا بورادا یایین .
- شعرده بیر سیرا دبک کلمه لری ایشلتمکلرله زیروه لره قالخماق اولماز . شعر تغزل دئمک دیر . هر نه یین اوز یئری وار . بو سوزلر شعره سیغینمیر . سیز بو سرحدلردن اوزازق شاعیرلری اوزونو زه اورنک توتمادان اونجه کئشکه بیزیم بورا دا اوز شاعیرلریمیزین یازیلاری ایله یاشایاردینیز .

- چوخ جالب دیر کی عریانلیق ایلکم عصیانیمیزدیر و آغ اپ اغ قانین هئچ ربطی بیر بیریله یوخودور .

- نه ایسه سیزدن خواهش ائدیرم اگر شعر دونیاسیندا قالماق ایستیر سیز ، بو خالقا یازماتق ایستیر سیز و خالق اراسی سئویلمک ایستیرسیز ده اخلاقی ، مذهبی و جامعه نی سرحدلرینی رعایت ائدین . اوزونوز ده گورورسوز کی هله اوز دوستلرینزدا سیزی دانلاییر نه قالا خالق . بیرده بو شعری ائوینیزده وئرین اوخوسونلار .

- من سئوگی شعری یازارام . وطن شعری یازارام . شعرلیرم هامینین الینده اولا ر. موسیقی ایله اوخونار ، دیکلمه ائدیلر ، حفظ ائدنلر ترجمه ائدنلر وار ، سوئیله سئویله اوخونور . باشقا شاعیرلر کیمی . اما بیلمیرم بو شعری سیز هارادا یایا بیلرسیز . یایماقا اماکن تاپسانیز دئیین او یئری بیزده اویره نک

- سون دا سیزه اوغورلار و یئنه ده اللاه و ملت یولونا دونمه یینیزی ارزی لاییرام

دارتیشمادان دارتیشمالار (5)

:: یازی دوشونجه و آنلامدان یارانیر

 رامین جهانگیرزاده:

حؤرمتلی ساوالان قیزی!

1ـ (کتده کی ساواشیب یامانلاشان آروادلار کاغیذ اوستونه سؤیوشلرینی گتیرسلر البتده کی بیزدن داهی شاعیردیلر.

یامانلاشان آروادلار و کیشی لر یازماق هونر قابیلیتلری اولسایدی البنده کی داهی شاعیر اولاردیلار. اؤزو ده مگر دونیادا هئچ بیر یامان یوز دئین شاعیر یوخدورمو؟!! بو چوخ گؤزل ایتیفاقدیر بونو آلقیشلامالییق. اوندا سیزین نظرینیزه تکجه یامان یوز دئمه ینلر شاعیر اولا بیلر؟!!) بونلاری تکرار اولاراق گتیردیم کی بیر دؤنه ده اوخویوب جاوابینیزی ائله بو یازیلاردان آلاسینیز.

2ـ شعر هر نه دن اؤنجه بیر سوژئتین قیغیلجیم کیمی دوشونجه میزه اود وورماغیندان یارانیر. دوشونجه میزده یارانان بو سوژئت بیزی اودلاییر. آلیشیریق و بو آلیشمالار همن سیز دئدیینیز دویغولاریمیزدیر. بورادادیر کی شعر هر نه دن اؤنجه بیر جنین کیمی دوشونجه میزده یارانیر. بو جنیننین نئجه دوغولوماغی شاعیرین نئجه دوشونوب و نئجه آلیشماغینا قاییدیر.

بو جومله نیزی دیققتله اوخویون« من فیکر ائدیرم....» بورادا هر نه دن اؤنجه سیز دوشونرکن بیر سؤزو آنلاتماغا چالیشیرسینیز. بورادادیر کی شعرین هر نه دن اؤنجه دوشونجه میزده یارانماسینا دیققت ائتمه لییک.

3ـ من دئدیم یئنه تکرار ائدیرم من بو شعرده اوخوجولارا چیلپاق گزمه یی و یا اورادا گئدن ایشی تکلیف ائتمه میشم. من بورادا یازیمدا گئدن احوالاتین یاخشی یا پیس اولماغینی گؤسترمه میشم و بونو اوخوجولارین نئجه دوشونوب نئجه آلماغینا قویموشام. ایستر اوخوجو بو اوالاتا پیس باخسین یا یاخشی منیم اوچون اؤنملی دئییل. منیم اوچون ان اساس اؤنملی سی اوخوجویا نئجه بو یازینین تأثیر ائدیب اونو دیسکیندیرمه ییدیر.  باخین گؤرون نه قدر فیلیملر ، رسملر و  نثرلر و حتی شعرلر بو مؤوضوعلار اساسیندا یارانیبدیر. اوندا گرک بیز اونلارین یارادیجیلارینین آرادان گؤتورمه لییکمی؟!!

4ـ «سیز اؤزونوزو بو یازیلارلا شاعیر آدلاندیریرسینیزمی؟» سیز نییه دئدیینیز سؤزو دانیرسینیز. اونلار بؤیوک شاعیر  اولدوغوندان و نئجه یازیب و نئجه یاراتماغیندان ایشیم یوخدور. اونلار نه قدر گوجلو یازسالاردا اؤز زامانلاریندا نئجه دوشونوب نئجه یازماغینا دوشونوبلر و اؤز زامانلارینی عکس ائتدیریبلر. من نه قدر گوجلو یازسام دا  اؤز زامانیمی عکس ائتدیره بیلمه سم هئچ بیر تأثیریم اولمایاجاق. بیر یازینین گوجو اونون اؤز زامانیندا یارانماسینا قاییدیر. من ایندی یاشاییرام و ایندیلییمی یاخشی دوشوب یازسام چوخ بؤیوک ایش گؤرموشم.

5ـ مسأله هانسی پرابلئملرین اساس اولدوغو  و اونلارین حل ائتمه ییندن گئتمیر. مسأله بو پرابلئملری آچیقلاماقدادیر. سن تمل توتوب توتماماغین اؤنملی دئییل. اؤنملی بو تمل توتدوغون پرابلئملری نئجه آچیقلاماقدیر نئجه بو پرابلئملرین حل ائتدیینه یول تاپماق شاعیرین ایشی دئییل.

6ـ اوندا سیز دئدیینیز کیمی شعرده یالنیز تمیز سؤزلر ایشلتمه لییک؟!! پیس یا یاخشی بیلدییمیز سؤزلری بیز یاراتمیشیق. سیزین منیم بو یازیمین آنلامیلا موشگولونوز وار یوخسا منیم بو یازیمین سؤزلرینده هوسله شهوت آدلاندیردیغینیز هئچ بیر سؤز یوخدور. بورادا سیز بیر سؤزو اساس توتوب منی توپارلاماغا باشلاسازدا  بو سیزین موشگولونوزدور. من چوخ راحاتام. سیزین بو عوذر ایسته مه جسارتینیزی سیزه چوخ ساغ اول دئییرم. هامی سحو ائده بیلر چونکو هئچ نه موطلق دئییل.

7ـ من ده یئنه دئییرم بیر یازیچینین تا یازیسی اوخوجونون الینه چاتماییب اوخوجو اؤنملی اولا بیلمز. یازیچی یالنیز یازییا  و اونون نئجه تأثیر بوراخدیغینا دوشونمه لیدیر ایستر بو یازی اوخوجونون آجیغینا گلسین ایستر خوشونا گلسین. بورادادیر کی یازیچی سئوینمه لیدیر چونکو یازی هر ایکی هر ایکی جهتده اولان اوخوجویا تأثیر باغیشلاییب. منیم بو یازیم سیزه تأثیر بوراخماسایدی سیز بو یازینین اوستوندن سووشوب هئچ بیر نظر قویمادان کئچه جکدینیز. پس دئمک اولارکی بو یازی هم پیس باخانان هم یاخشی باخان اوخوجویا اؤنملی دیر. « … هئچ نه آنلاماییب یازیچی اولورلار...»  بو جومله نیزه اساساً بیر یازی دوشونجه و آنلامدان یارانیر و هر کیمسه آنلامادان بیر یازینی دویغولارینا سؤیکه نرک یازیر او یالنیز  بیر پارا هئچ بیر تأثیر باغیشلامایان سؤزلری بیر ـ بیرینین آردیلا دوزه بلر. البتده اوخوجون سؤزلرین ائشیتمک چوخ گؤزلدیر مادام کی یازیچی یازیسینی اونون الینه چاتدیر. سیزین هر نه قصدینیز اولسادا یالنیز بیر اوخوجو کیمی نظر وئره بیلرسینیز من ده سیزدن فایدالانا بیلرم.

8ـ چوخ ساغ اولون کی منیم یازیمی یاخشیجاسینا آنلاییبسینیز آمما عزیز باجیم سیز یالنیز بیر یازیدا گئدن دورومدان دانیشا بیلرسینیز منیم نه اولدوغومو و نئجه اولدوغومو قویون روانشناسلار نظر وئرسین. سیز دئیه بیلرسیز کی بو یازیدا گئدن احوالات پیس یا یاخشی دیر. بیر یازی یازیچینین تام شخصیتینی بلیندیرمز. بیر یازیچی یازیلاریندا اؤزونو تام بیر شخصیتلی آدام گؤسترسه ده او یازیلار اونون تام شخصیتلی اولماغینی گؤستره بیلمز. شخصیت مسأله سینی اینسانلارین شخصی یاشاییشیندان و اونلارین نئجه باشقالارییلا داورانماغیندان اؤیرنمک اولار.

9ـ هانسی چیلپاقلیغی؟! سیز بو یازیدا کیمسه یه چیلپاقلیغی تکلیف ائتمیش بیر میصراع گؤرورسوزمو؟!! سیزجه شعره سیغان سؤزلری نه اساسدا یازمالیییق؟!!  من بو یازیدا هئچ بیر شئیی تکلیف ائتمه میشم آمما سیز باشدان آیاغا تکلیف ائتمک زورونداسینیز و هر نه یی سیزین دوشونجه نیزله اویغون اولدوغونا اساس توتورسونوز.

10ـ باغیشلایین بو یازینین هانسی میصراعسینی نقده چکیبسینیز؟!!  بیر ده کی من اؤز یازیمدان دیفاع ائتمیرم بلکه سیزین نئجه داورانماغینیزا دوشونرک یانلیش یولو سئچدیینیزی نظره آلیب نظرلریمی یازیرام. سیز اؤز اوستادینیزی یاخشی تانییب تانمادیغینیزلا ایشیم یوخ بلکه مسأله اوندادیر کی ایندی مرید مرادلیق زامانی دئییل. هر کس موستقیل بیر فیکیردیر. هئچ کیم هئچ کیمه باغلی دئییل. اینسانین بارماق ایزلری فرقلی اولاراق اینسانین دوشونجه لری ده فرقلیدیر. کیمسه نین کؤلگه سینده یاشاماق قالیر او اینسانین کؤلگه لره نئجه باغلیلیغینا. بیر ده سیز شعردن اینسانلیغی چاشباش سالمایین. ایندی مدرن دونیادا ایداعاسی اولان کیمسه شاگیردلیگ ایداعاسی ائدیب اؤزونو اوستاد کیمی گؤسترمز!! 

11ـ سیزین بو اؤرنه یینیزی نظره آلیب سیزه بیر دؤنه ده دئییرم کی یازیلاری بیر دؤنه ده اوخویون گؤرون او یازیلارین فضاسیندا باش وئرن احوالاتین هانسی بیر  - بیرینه بنزه ییر. منیم باشارا بیلیب بیلمه مه ییمی آنلاتدیغینیز اوچون تشککور ائدیرم آنجاق دییه سن کیمسه نی ایره لی وئرمکله اؤزونوزو ثابیت ائتمک ایسته ییرسینیز.  هله سیز سککیز یوز ایل بوندان قاباغین فضاسینی یاشاییب دوشونورسوز البتده کی بئله بیر فضالارین نه اولدوغونو یاخشیجاسینا آنلایا بیلمزسینیز.

منیم بیلمه دییم قارانلیق نوقطه لر سنین قارانلیقدا چابالاماغیندیر.

منیم آنلامادیغیم سیزین آنلامادیغینیز آنلاردیر.

درین سایغی لاریملا

دارتیشمادان دارتیشمالار (4)

:: حقیقتین عوریانلیغیندان نه قورخورام نه قاچیرام

ساوالان قیزی:

1-رامین بی اؤزونوز ده دئدییینیز کیمی یامانلاشان آرواد-کیشی لر اگر یازماق هونرلری اولسا شاعیر دیرلر،سیز بوندان اؤنجه بوتون یامانلاشان لاری شاعیر بیلیردینیز. البته کی یامان-یوز دئین شاعیر چوخدور آنجاق اونلار شاعیر دئییللر، یالنیز اؤزلری اؤزلرین شاعیر بیلیرلر.

2-من بیلمیرم سیز نئجه شعیر یازیرسینیز،یانی اؤنجه فیکیرلشیب سونرا دویغولانیرسینیز می؟

من فیکر ائدیردیم شاعیر یا یازیچی دویغولانارکن شعر عالمین یارادیر.
بیر ده کی دئدیگیم تمیز دویغو بوتون شهوت لردن ، هوس لردن ، یامانلاردان و... اوزاق دویغودور.و بو سیزین یازیلارینیزدا بیری بیرینه چوخ قاریشیب .من ایلک دؤنه ده دئدیگیم کیمی بیزیم شهوتیمیز یارانماغیمیزین لاپ ایلکیندن واردیر و گؤزدن ایراق ساخلامالی بیر سؤز دئییل آنجاق شعرده اونو گتیرمک بیرآز منجه یانلیش دیر سیز بونو بیر مقاله عونوانیندا یازابیلردینیز.

3-منیم عوریانلیغا گؤره سورغوما سیز شعرینیزدن باشقا بیز یانیت وئریبسینیز. دقتلی اولون بو شعرینیزین آنلامیندان چوخ ترسه دیر. شعرینیزدن حئیوانلیق عوریانلیغی آنلاشیلیر.

4-من کیمسه یه شاعیر آدی وئرمه میشم و وئرمرم ده. چون بو ایشدن قورخارام. بو سیزین اؤزونوزسوز کی شاعیر اولورسونوز یوخسا شعیر آدلی بیر یازی یازمازدینیزمن دئمه دیم سیز نسیمی،خطایی و باشقاسی سینیز یا اؤزونوزو اونلارا بنزدیرسینیز بلکه دئدیم سیز عوریانلیغی بئله فرض ائتسه نیز اونلاری کسن شاعیر بیلمیزسینیز.

5-من تمل توتدوغوم پرابلئم لری سیزمندن ده چوخ یاخشی تانیییرسینیز اؤیله کی اونلاری اؤزونوز یازیمسینیز.دئدیگینیز کیمی اؤرنک اوچون : موحاریبه، آجلیق، آیریلیق، سئوگی، آتا، آنا، زیندان و ...

6-هوسله شهوت هر کسی ماراقلاندیران بیر دورومدور آنجاق شعیرده یوخ رامین بی.سؤزلره ده دون دامن گئیدیرمک گرک دئییل بیز هر نه یی گرک چوخ آچیق و آیدین دئیک آنجاق یئنه ده بو هر نه دئدیگیم هامیسی شعیرده سیغماز. اوخوجو لارادا آنلام لاری قدر آد وئرمک اولار آنجاق بو یانلیشا گؤره(اوخوجولارینیزا آد وئردیگیم اوچون)عوذور دیله ییرم.

7--یئنه ده دئییرم اوخوجو اؤنملی دیر من بعضی اوخوجولارین(بو اوخوجولاردان قصدیم یالنیز شاعیرلردیر) اؤنرلرین هئچ زامان قبول ائتمیرم بیلیرسینیز نییه؟چون اونلاری بیر سیراشعیر ساحه سینده بؤیوموش اینسان بیلیرم کی هئچ نه آنلاماییب یازیچی اولورلار بیرده اوخوجونون سؤزون ائشیتمک نه ضرری وار بلکه اونلار بیلمییه-بیلمییه بیر سؤز دئیه لر کی بیزه چوخ فایدالی اولا البته بو دئدیگیم اوخوجو یالنیز اونلاردیر کی بیزیم شعریمیزدن هئچ نه آنلاماییب دانیشیرلار آنجاق شعیری بوتون وارلیغلاری ایله آنلایان لار دوغوردان بیر سؤز دئیه بیلرلر کی هرزمان کاریمیزا گله.بیر ده کی من دئمه دیم اوخوجو سؤزونون اساسیندا شعیر یازاق بلکه اونلارین سؤزون ائشیدیب فایدالانماق قصدیم ایدی. سیزده "اوخوجو اؤنملی دئییل"سؤزونوز اساسیندا دئدیم "نظر"بؤلومون سیلین چون بو سؤزونوز تام یالنیش بیر فیکیردیر.

8-من شخصیتینیزله موشکولوم یوخدور شعرینیزله موشکول تاپیب سونرا ایسه شخصیتینیزله موشکول تاپیرام. فیکیر ده ائتمه یین شعرینیزی دوزگون آنلامامیشام من بیر یازینی کی نئچه دؤنه اوخویوب یاخشی جاسینا اونودوشونوب آنلاماسام هئچ زمان نظر وئرمرم.

9-حقیقتین عوریانلیغیندان نه قورخورام نه قاچیرام. من بلکه ده او آز قادینلاردانام کی چیلپاغلیغی تام شکیلده قبول ائتمیشم و دانمارام هئچ وده .مین لرجه دؤنه دئیرم بو چیلپاغلیق بئله جه شعیرده البته منجه سیغماز سیز کی بونو بوتون پرابلئم لردن اؤن ده بیلیرسینیز اونو شعیرده یازماغینیز یاخشی دئییل دیر و بیر مقاله اونا گؤره یازسایدینیز لاپ یاخشی اولاردی .دایجا بو یازی بو فورم دا چوخ بیزه فایدالی اولاردی.

10--من باشقا ایشلرله ایشیم یوخدور یالنیز و یالنیز و یالنیز و...شعرینیزه گؤره تنقید یازمیشام.

البته من هئچ وده هئچ سؤزدن اینجیمه رم بو سؤزلرده منی اینجیتمز..بو سیزین حققینیزدیرکی اؤز یازینیزدان دفاع ائده سینیز.من یاخشی اوستادیمی تانیییرام و بیلیرم کی اونون اینسانلیغی شاعیرلیگیندن چوخ اوستون دور منجه بوتون بؤیوک شاعیرلر ،شاعیرلیکدن ایراق بؤیوک بیر اینسان دیر لار و بو بؤیوکلوک اونلارین شعیرلرین ده یوکسلدیر.

11-اؤرنک اولاراق کیان خیاو بیین " ک...ل...م...ه" و یا "اؤلوم قیری"شعری ایلک باخیشدا سیزین بو شعرینیزه بنزه ییر بئله آنلاشیلیر کی بیر سئویشمه نی آچیقجاسیناشعرینده یازیب دیر آنجاق ایکینجی باخیشدافرقلی اولور اوچونجو باخیشدا اوندان داها فرقلی و... بئله جه شعیری تام شکیلده آنلاماق اولور ."نه گؤزل شعیردیر"دئییر اوخوجو و"بوندان گؤرل شعیر ده اولابیلرمی؟"فیکیرلشیر .سیزین شعرینیزده بو فورمادادیر آنجاق بو فرق ایله کی نه قدر باخیش درینلشیر آنلامی فرق ائتمیر و یالنیز بیر شهوت آنلاشیلیر منجه کیان بی بؤیوک بیر اینسان اولدوغوندان باشقا لاپ بؤیوک شاعیردیر من بئله جه فیکر ائدیرم کی کیان بئله بیر شعیر یازماقدا هامی شاعیرلردن ایره لی دیر. چون اوندان قاباق کی لار(ایرج میرزا،کریمی و...)یالنیز بیر سئویشمه یازیبلار و بو سئویشمه نین دالیندا باشقا بیر سؤز دئیه بیلمه ییبلر یا خود ایسته میبلر دئیه لر. ایندی ایسه چوخلاری سیزین تک ایسته ییرلر بئله بیر فورمادا باشقا سؤزلر دئیه لر آنجاق باشارا بیلمیرلر من ایندییه قدر یالنیز کیان بیین شعیرلرنده باشقا آنلام لار تاپمیشام(بلکه ده یالنیش فیکر ائدیرم و اوندان سونرادا بئل بیر شعیر یازان وار)

منده اومودوم وار منیم نظرلریم سیزین بیلمه دیینیز قارانلیق نوقطه لری ایشیقلاندیرسین.

"بعضا دونیادا آنلامادیغیمیز لاری باشقالارین آنلامازلیق حسابینا قویماق ایله اؤزوموزو توجیه ائتمک ایسته ییریک"

سایقیلارلا

دارتیشمادان دارتیشمالار (3)

:: شعر دیلی عوریان بیر دیل دیر

سالاملار

" آغ آپپاق قانی " آدلی شعیری اوخویارکن اونو یالنیز ساده جه بیر شعر حیس ائتدیم. منیم خوشوما گلمه سه ده اؤزومه ایذین وئرمه دیم اونون شاعیرین یامانلاییب یا باشقا سؤزلرله اونا یول گؤسترم. منجه ساده جه بیر شعیر ایدی و شعیر بوتون ساحه لرده یازیلا بیلر. شعر اینسانلارین گیزلی دویغولارینی گؤستریر و بیزیم دویغولاریمیزدان یارانیر. شعر دیلی چوخ اؤنملی دیر نیه کی اینسانین دونشونجه لری و گیزلیجه دویغولاری ایله ایلگیله نیر. او دویغولار کی ساده جه سؤزلرده، بیزیم دیلیمیزده یئرلشمیرلر . اونون اوچون شعر دیلی عوریان بیر دیل دیر. و شاعیرین فرقلی اولدوغو بو عوریان دیل اوچون دور . "عوریانلیغیمیز بیزیم ایلک عوصیانیمیز اولاجاق" آدلی یازیدا گؤزل دوشونجه لر گؤردوم و ساده جه اؤز نظریمی یازیب، اوندا اولان دوشونجه لردن فایدالانماغیمی بیلدیردیم. آنجاق او زامان کی بؤیوک شاعیرلریمیزین بیریسی بو نظریم اوچون منه کامئنت قویویب، منیم ساده بیر قیز اولدوغومو دوشونوب، منه یول گؤستریب، "

سیزه باشقا گؤزله باخان اولان اولار" دئییب، منی دانلادی. اؤزومدن اینجییب، بئله دویدوم کی بلکه من بو یازینی یانلیش آنلامیشام. اون اوچون نئچه دفعه بو یازینی اوخویوب، فیکیره دالدیم. آنجاق اوندا پیس سؤزلر، دوشونجه لر گؤرمه دیم.

گؤزل باجیم، ساوالان قزینین نظرلرین بورادا اوخویارکن، اؤزومه تکلیف ائتدیم بو یازینی نئجه دویدوغومو بیلدیریب و او قدر جسارتیم اولسون کی منه باشقا گؤزله باخماق قورخوسوندان اؤز دوشونجه لریمی یاساقلاییب و یانلیش بیلمه ییم.

بو یازیدا منجه دیرلی بیر سؤزلر وار.

"عوریانلیغیمیز بیزیم ایلک عوصیانیمیز اولاجاق"

" اینسانلیغا دوشونمک، اینسانلاری سئومک، سئومک و یئنه ده سئومکدیر."

" اینسان، اینسان اولماق اوچون چالیشیرسا، اینسانلیغی اونودوب اینسانسیزلیق یولو ایله اینسانلیق قازانماقلا اینسان اولا بیلمز."

بو سؤزلرده من گؤزل دوشونجه لر گؤرورم. بو یازی سئکسی بیز اوچون تبلیغ ائتمه ییر. عوریانلیق یالنیز ایسانین جیسمی عوریانلیغی دئییل. گئرچک اوچون چالیشان و اوندان دم وورانلار نئجه بو سؤزلری یانلیش دوشونورلر؟!!

اونلار کی عوریانلیقدان باشقا بیر معنا دوشونورلر، یقین اؤز فیکیرلری و دوشونجه لرینده موشکول وار. اونلارین دوشونجه لری یانلیش دیر. بیزیم چوخ پرابلئم لریمیز وار.

بونو هئچ کس دانمیر. آنجاق من بیلمیرم اونلار کی بو پرابلئم لره فیکیرلشیرلر.

اؤزلرینده اولان پرابلئم لری هئچ دویورلارمی؟ بیز اؤنجه اؤزوموزدن باشلامالییق. سونرا میللتیمیز و بشرییتین پرابلئم لرینه فیکیرلشمه لییک. من اؤز باجیمدان تعججوبله نیرم او یئرده کی یازیر: "یامانلاشان آروادلار یا خود کیشی لر نه شاعیردیرلر ونه ده یازیچی"

گؤزل باجیم او یامانلاشان آروادلارین بیریسی بیزیم آنامیزدیر. او کس کی گؤزل دویغولارین لای لا لاریندا سن اوچون گؤستردی. او کس کی هر زامان گؤزل ماهنی لار، اوخشامالار اوندان ائشیبدیب و بلکه شعیر یازماغینی اونون گؤزل ماهنی لاریندان اؤزللیکله اوخشامالاریندان باشلاییبسان. کوچه ده یامانلاشان آروادلاردا شعر دیلی وار بلکه ده سیزلردن یاخشی. بونو اونوتمالیسیز شعیر دیلی ساوادا باغلی دئییل. بیر عامی آدام بلکه سیزلردن یاخشی شاعیر اولا بیلر.

منیم دوشونجه لی باجیم سنین آتان اونلاردان بیری دیر. یقین اونون شعرلرین ائشیدیبسن می؟!!!

سایقیلارلا

 سارای

Daşlar

1

Meydandakı təndisin ürəyi daşdan olsa da

Heç olmasa saçlarında

yuva qurmuş serçələrin

Ürəyini döyündürür…

2

Bir gün daşa dönsəm

Bütün sirlərimi

Daşlara deyəcəm!

3

Güzgülərin nəfəsinə dözməyən daşlar

Yalniz sındırmağa düşünürlər

4

Birdən-birə

Göydən daş yağsa…

Mən də daşa dönəcəm

Daşlar başima dəyib

Paramparça olacaqlar!

5

Daşlar kağızları sındıra bilmədiyi üçün

Bir – birlərini sındırmağa çalışırlar

6

Daşların çartlağından çıxan çiçəklər

Daş olmasınlar deyə

Baş qaldırırlar

7

Binalardakı yonulmuş daşlar

Şəhərin daş olmağını anladırlar

8

Daşlar bir gün ayağa qalxsalar

Hər nəyi daşa döndərəcəklər

9

Məzarlarda olan baş daşlara

Balaca bir daşla döysən

Ölüləri yuxudan oyadıb

Danışa bilərsən

10

Dünyanın hər yerinə baxsan

Daşların hüzurunu

Daşların düşüncəsini görmək olar

Bizi hisara cəkib azadlığımızı alırlar

Bizi bir – birimizin canına salirlar

Bədənlərimizi fəth edirlər

Daşlar hər nə edirlər

Ancaq nədənsə

Heç kim daşlara bir söz demir…!

داش­لار

1

مئیدانداکی تندیسین اوره­یی داشدان اولسا دا

هئچ اولماسا ساچلاریندا

یووا قورموش سئرچه لرین

اوره­یینی دؤیوندورور…

2

بیر گون داشا دؤنسم

بوتون سیرلریمی

داشلارا دئیه­جم!

3

گوزگولرین نفسینه دؤزمه­ین داش­لار

یالنیز سیندیرماغا دوشونورلر

4

بیردن ـ بیره

گؤیدن داش یاغسا…

من ده داشا دؤنه­جم

داش­لار باشیما دییب

پارامپارچا اولاجاقلار!

5

داشلار کاغیذلاری سیندیرا بیلمه­دییی اوچون

بیر ـ بیرلرینی سیندیرماغا چالیشیرلار

6

داشلارین چارتلاغیندان چیخان چیچکلر

داش اولماسینلار دئیه

باش قالدیریرلار

7

بینالارداکی یونولموش داش­لار

شهرین داش اولماغینی آنلادیرلار

8

داش­لار بیر گون آیاغا قالخسالار

هر نه­یی داشا دؤنده­رجکلر

9

مزارلاردا اولان باش داشلارا

بالاجا بیر داشلا دؤیسن

اؤلولری یوخودان اویادیب

دانیشا بیلرسن

10

دونیانین هر یئرینه باخسان

داشلارین حوضورونو

داشلارین دوشونجه­سینی گؤرمک اولار

بیزی حیصارا جکیب آزادلیغیمیزی آلیرلار

بیزی بیر ـ بیریمیزین جانینا سالیرلار

بدنلریمیزی فتح ائدیرلر

داش­لار هر نه ائدیرلر

آنجاق ندنسه

هئچ کیم داشلارا بیر سؤز دئمیر…!

دارتیشمادان دارتیشمالار (2)

(بورادا گئدن موباحیثه­لر «عوریانلیغیمیز بیزیم ایلک عوصیانیمیز اولاجاق» و «آغ آبباق قان » آدلی یازیلارا گؤره­دیر. حؤرمتلی «ساوالان قیزی»نا دا  درین مینتدارلیغیمی بیلدیریرم کی بیر باشقا بحثی آچماغا کؤمک ائتدی)

ساوالان قیزی:ـ سلام لار رامین بی

رامین جهانگیرزاده:ـ علیکم سلام ساوالان قیزی

ساوالان قیزی:ـ شعرینیزله بو یازینیزی اوخودوم.اومودوم وار هر نه دن ایراق سؤزلریم دن اینجیمه ییب دقتلی اولاسینیز.

رامین جهانگیرزاده:ـ نظرلرینیزی اوخودوم اومیدیم وار سیزه ده دیققتلی اولارکن سؤزلریمدن اینجیمه یه سینیز.

ساوالان قیزی:ـ یامانلاشان آروادلار یا خود کیشی لر نه شاعیردیرلر نه ده یازیچی.

رامین جهانگیرزاده:ـ یامانلاشان آروادلار و کیشی لر یازماق هونر قابیلیتلری اولسایدی البنده کی داهی شاعیر اولاردیلار. اؤزو ده مگر دونیادا هئچ بیر یامان یوز دئین شاعیر یوخدورمو؟!! بو چوخ گؤزل ایتیفاقدیر بونو آلقیشلامالییق. اوندا سیزین نظرینیزه تکجه یامان یوز دئمه ینلر شاعیر اولا بیلر؟!!

ساوالان قیزی:ـ  سیز شعر عالمین فسادخانالارلا دییشیک توتوبسونوز.شعری نه سانیرسینیزمی؟

رامین جهانگیرزاده:ـ شعر عالمیمی فسادخانلارلا دییشیک سالماغیما ایشاره ائتدینیزسه دققتینیز اوچون ساغ اولون آمما بو تکجه بیر یازیدیر و من هئچ نه یی دییشیک سالماق ایسته میرم.

ساوالان قیزی:ـ  شعر تمیز دویغولارلا شعر اولور.

رامین جهانگیرزاده:ـ شعر دویغودان یوخ ایلک دؤنه دوشونجه دن یارانیر سونرا دویغولارلا یازیلیر. بیر ده تمیز دویغودان سؤز آچماغینیز نه دئمکدیر؟! دویغو یالنیز شعرین یازماغینا کؤمک ائدیر.

ساوالان قیزی:ـ کیمسه عوریانلیغین دانمیر.آنجاق هانسی عوریانلیق؟؟؟؟؟؟؟؟؟؟؟

اگر چیلپاق یاشاماغی دوغرو معناسی ایله اساس توتاق بس بیزیم حئیوانلارلا نه فرقیمیز اولا بیلر؟

رامین جهانگیرزاده:ـ او عوریانلیق کی هر نه یی گئرچکلندیریر. ماسکالاری گؤتورور. اینسانین هر نه یینی آچیقلاییر. قورخاقلیغیمیزا سون قویور.

بوردادیر کی اینسانین حیوانلا فرقینی بیله جکسن. اینسانین عوریانلیغینی گؤروب هر نه یی آنلایاجاقسان. داها اینسان جیلدینده اولان حیوانلاری یاخشی جاسینا تانییاجاقسان.

ساوالان قیزی:ـ  سیز اؤزونوزو بو یازیلارلا شاعیر آدلاندیریرسینیزمی؟

رامین جهانگیرزاده:ـ من هئچ واخت اؤزومو شاعیر آدلاندیرمامیشام بو سیزلرسیزکی یازیلاریم خوشونوزا گلنده منه شاعیرلیک آدی وئریب زیروه لره اوجالدیبسینیز، یازیلاریم خوشونوزا گلمه ینده زیروه لردن ائندیریب وئردییینیز شاعیرلیک آدینی اوستومدن گؤتوروب باشقا ـ باشقا آدلار قویورسونوز.

ساوالان قیزی:ـ  اوندا بیزیم اسکی ده یاشایان بؤیوک شاعیرلریمیز اؤنک اولاراق نسیمی،خطایی،فیضولی و... شاعیردئییل لر چون اینسانین عوریانلیغینا شعر یازمیبلار(البته اینساین عوریانلیغینا شعر یازیبلار آنجاق سیز دئدیینیز عوریانلیغا یوخ).

ندن اؤزونوزو توجیه ائدیرسینیز؟

رامین جهانگیرزاده:ـ من نه فضولی یم نه خطایی نه ده نسیمی من یالنیز اؤزومم و باشقاسینا دا بنزتمک ایسته میرم اؤزومو. یالنیز اؤزوم اولوب و اؤزومه قاییتماق ایسته ییرم. بیر ده کی من ده سیغماز ایکی جهان!

من توجیه ائتمیرم سیزسیز کی منه توجیه ائتمه یین دئییب توجیه آختاریرسینیز.

ساوالان قیزی:ـ  اینسانین ازلدن شهوت و هوس پرابلئمی وار.بو یئنی بیر سؤز دئییل.

رامین جهانگیرزاده:ـ چوخلو سؤزلر وار کی یئنی سؤزلر دئییل آمما شاعیرلر دؤنه لرجه و ایندی ده او سؤزلر باره ده یازیب یارادیرلار. میثال: موحاریبه، آجلیق، آیریلیق، سئوگی، آتا، آنا، زیندان و ...

ساوالان قیزی:ـ  بیزیم یاشادیغیمیز زامانا گؤره منلرجه پرابلئم وار ،بیز بونلاری تمل توتمالییق.

رامین جهانگیرزاده:ـ سیز او تمل توتدوغونوز پرابلئملری لیست ائدیب منه گؤنده رین تا من او پرابلئملره باشلاییم شعر یازیم بلکه حل اولوندو او پرابلئملر!

ساوالان قیزی:ـ  هوسله شهوتیمیز قالدی ائویمیزده یادا...

رامین جهانگیرزاده:ـ هوسله شهوتمیزین هاردا قالماغیندا ایشیم یوخ آنجاق منی ماراقلاندیران بو توپلومسالدا گئدن بیر دورومدور.

ساوالان قیزی:ـ  بونلار شعره سیغینان سؤزلر دئییل.بئله بیر شعرلری سئونلر و یازانلار هوس گده سی دیرلریوخسا اوخوجو یا شاعیر دئییل لر.

رامین جهانگیرزاده:ـ اوندا بوندان بئله سؤزلره دون ـ دامن و یا کت ـ شالوار گئیدیرمه ییمیز یاخشی اولار!!!! منی نه آدلاندیریرسینیز آدلاندیرین هوس گئده سی...آ نمنمنه گئده سی...آ و ... من دئدیم کی آدیمین کؤلگه سینده یاشامیرام. آنجاق سیز یالنیز منه گؤره نظرینیزی سؤیله یین اوخوجولارا بئله آدی یاراشدیرمایین.

ساوالان قیزی:ـ  بیر ده بیز یالنیز اؤزوموزه شعر یازمیریق،بئله ایسه ندن شعریمیزی باشقالارا اوخویوب وب صحیفه سینه یوکله ییریک؟

رامین جهانگیرزاده:ـ یازی اوخوجونون الینه چاتاندان سونرا اوخوجونون نه دره جه ده اؤنملی اولدوغو بللی اولار. بیز اوخوجونون تأثیری آلتیندا یازمامالییق چون اوندا یازیلاریمیزی سانسور ائدیب اوخوجونون خوشونا گلسین دئیه یازاجاغیق و اوندا بیر یازی گئرچکلیکدن اوزاقلاشیب قوندارمالاشاجاق.

ساوالان قیزی:ـ  اوخوجو چوخ اؤنملی دیر.سیزه اؤنملی دئییلسه وئبلاگینیزی باغلایین یا "نظر"بؤلومون سیلین. چون هر حالدا من اوخوجو اولوب شعرینیزی اوخویاجاغام .سئوسم،سئومه سم و ندنین سیزه کامئنت قویاجاغام.

سئومیرسینیزسه توجیه ائتمه یین.

رامین جهانگیرزاده:ـ سیز یالنیز بیر اوخوجوسونوز و بوتون اوخوجولارین یئرینه منیم وئبلاگ و نظر بؤلومومون باغلانیب و یا سیلینمه یینه حؤکم وئره بیلمزسینیز.

سیز اوخوجو اولارکن بیر یازینی سئومه یه ده حاققینیز وار سئومه مه یه ده. چونکو من یازیمی اوخوجولاریمین سلیقه سی اساسیندا یازمامیشام.

من دئدیم کی توجیه آختارمیرام و یالنیز هر نه یی یئتیرنجه آچیقلاماق ایسته ییرم.

ساوالان قیزی:ـ  منجه شخصیت پرابلئمی اولمایان بئله شهوتلرین هارایلاماز یا باشقالارینین سئویشمه یینه اونلاردان ایزین سیز قولاق وئرمز(بلکه ده بونو شعرین نئجه باشلاماغینا گؤره یازیبسینیز).

رامین جهانگیرزاده:ـ سیز یازی باره ده نظر وئرین شخصیتیمله موشکولونوز وارمی؟! بیر ده کی منیم شخصیتیمه توخونماغینیز قاییدیر اؤز شخصیتینیزه. هله شعرین دوزگون آنلامینی آنلامامیش منه تؤهمت وورماغینیزین سببینی بیلمیرم!! من هئچ کیمه سیز دئییینیز چیلپاقلیغی تکلیف ائتمیرم. من حقیقتین عوریان اولدوغونو هارایلاییرام. بلکه اولمایا منیم هارایلاریمدان یوخ حقیقتین عوریانلیغیندان قورخو یارانیر.

ساوالان قیزی:ـ  سیزین باشقا شعرلرینیز بوندان داها گؤزل ایدی.بو شعرینیز تام شعر شکیلده و قایدالاریندا اولسادا شعر دئییل.

رامین جهانگیرزاده:ـ البتده ایندی حاققینز وار هم منیم یازیما شعر دئیه سینیز و هم دئمه یه سینیز باشقا ایشلرله ایشینیز اولماسین سیز یالنیز یازی باره ده نظرینیزی یازین من اوندا هئچ واخت اینجییب اینجیتمه رم ده!

ساوالان قیزی:ـ  فیکر ائدیرم بیر آزدا باشقا بؤیوک شاعیرلردن تقلید ائدیبسینیز."کیان خیاو"بیین ایسته ییبسینیز شعرلرینه بنزده سینیز.آنجاق اونون یازیلارین یاخشی آلمیبسینیز دییه سن.کیانی بیین شعرلری چوخ بؤیوک و درین معنالی سؤزلر داشیییر و ساده بیر هوس دئییل.

بیرآز دقتلی اولوب درین فیکیرلشین.

رامین جهانگیرزاده:ـ کیان خیاو بؤیوک شاعیر اولماقدان علاوه بؤیوک بیر اینساندیر. کیان اینسانلیغی اینسانسیزلیق یولو ایله یوخ بلکه اینسانلیق یولو ایله قازانیبدیر. من کیانین اینسانلیغین شاعیرلیگیندن اوستون توتورام چونکو اینسانلیق ان بؤیوک شاعیرلیکدیر.

بیر ده کی بویورا بیلرسینیز یازیلاریمدا باش وئرن هانسی فضالار یا قورولوشو و یا دیلی کیانین فضالاریندان گؤتورولوب. آخی من یازیلاریمدا اولان فضالاری یالنیز اؤزوم یاشامیشام بو نئجه اولا بیلر؟!! اومیدیم وار منیم نظرلریم سیزین بیلمه دیینیز قارانلیق نوقطه لری ایشیقلاندیرسین.

"اینسانین بیلمه دیی اینسانا دوشمن دیر"

ساوالان قیزی:ـ  منی جسارتیمه گؤره باغیشلایین گرک اولان سؤزلر دئییلمه لی دیرلر.

سایقیلارلا

رامین جهانگیرزاده:ـ  سیزی ده جسارتینیزه گؤره آلقیشلاییرام و سیزه ساغلیقلار آرزیلاییرام. یولونوز ایشیقلی...

سیزه اوغورلار.

دارتیشمادان دارتیشمالار (1)

(بورادا گئدن موباحیثه­لر «عوریانلیغیمیز بیزیم ایلک عوصیانیمیز اولاجاق» و «آغ آبباق قان » آدلی یازیلارا گؤره­دیر. حؤرمتلی اسماعیل خرمی جنابلارینا درین مینتدارلیغیمی بیلدیریرم کی بو بحثی آچماغا کؤمک ائتدی)

اسماعیل خرمی:

سالام رامین بی

یازینی اوخودوم...... آنجاق من بیله ن هر شئیین اوز یئری وار . اگر قرار اولسا بیز آغزیمیزا گله نی یازاق اوندا طبیعی کی کتده ساواشیب و یامانلاشان آروادلار داهی شاعیردیلر. بیرده سویونماق نئجه عوصیانا چونور من آنلایا بیلمه دیم.سویونماق اوخوجویا نه وئره بیله رکی؟

من دوشوندویوم قده ر شعر او یازیلارا دئییلیر کی موختلیف شعر صنعتینده ن فایدالانیب یئنی بیر دانیشیقی, باشقالاری سویله مه دیکلری اساسدا , سویلهیه سن. بلکه بونو من اوزوم ده یئرینه تام یئتیره بیلمه یه م. بیری کی سکس دن یازماییر بو دلیل بونا دئییل کی او ریا کاردیر. و یاخود سکسده ن یازسا دا عوصیان دئییل دیر.

کئچمیشده زشت و زیبا شاعری آقای کریمی ایرج میرزا و حتی اخوان ثالث ده یازیب.

آنجاق سنی و منی راضی سالان اونلارین سکسی شعیر یوخ بلکه باشقا شعیرلری دیر.اونوتما کی سن یالنیز اوزون اوچون یازمیرسان. سنین اوخوجولارین هر یاشدان وار

اونا گورا ............

رامین جهانگیرزاده:

حؤرمتلی اسماعیل خرمی جنابلاری!

کتده کی ساواشیب یامانلاشان آروادلار کاغیذ اوستونه سؤیوشلرینی گتیرسلر البتده کی بیزدن داهی شاعیردیلر. سیزه تکلیف ائدیرم بیر ده یازینی اوخویاسینیز عوریان اولماق تکجه سویونماق معناسیندا دئییل. سیز بیر زاویه دن بو یازییا باخیرسینیزسا گؤرونور چوخ درین دوشونمه ییبسینیز. نییه سیز یالنیز بو یازیدا سکسه فیکیرله شیرسینیز؟! بیر آز فرویددان اوخویوب بیر آز دا ایجتیماعی علملره ایحاطه نیز اولسایدی بئله یازمازدینیز.

من سیزین جسارتینیزی آلقیشلاییرام و اومیدیم وار کی همیشه جسارتلی اولاسینیز.

بیر ده تکلیفیم وار میشل فوکونون سکسه یازدیغی مورد کیتابینی یاخشی اوخویاسینیز. اورادا میشل فوکو سکسوالیته نین دورومونو یاخشیجاسینا آچیقلاییب. بو تکجه بیزیم پروبلئمیمیز دئییل بوتون دونیادا بو پروبلئمین نئجه حل ائتدیینه دوشونورلر.

بیرده عزیز دوست شاعیر قوندارما فضا یاراتماقلا شاعیر اولا بیلمز. شعرین هانسی زاماندا یازیلدیغینی و نه اولدوغونو دا دوشونمه لیییک. کریمی، اخوان ثالث ایرج میرزا آدلاندیردیغین شاعیرلر اؤز زامانلاریندا یاشاییب یارادیردیلار. ایندی هز زامانین اوزونه گؤره شعر یارانیر. شعر دئدیین بیر زامانین تعریفینه سیغماییر. دونن سایدیغیمیز شعرلر ایندی شعر ساییلمیر.

شاعیر اگر باشقالارینا دوشونورسه ایلک دؤنه اؤزو اوچون یازمالی دیر. اوخوجونون نه ایسته دیی اؤنملی دئییل. اوخوجو یالنیز اوخوجو اولا بیلر. اگر ائله اولماسا اوندا لوطف بویورون اوخوجولارینیزین سیفاریشینی یادداشت ائله ییب سونرا اونلارین سیفاریشی اساسیندا یازین و یارادین...

هر حالدا سیزی یالنیز موغاندا اولان بیرینجی آدام گؤردوم کی اؤز آدینیزلا جسارتله نظرینیزی یازدینیز و کامئنت قویدونوز. چوخ ساغ اولون...

سیزه اوغورلار

اسماعیل خرمی:

حرمتلی رامین بی

1ـ لوطفن هر کیمسه نین درین دوشونمه یین اوز اوستونه آتین و اوزونوزو داهی سانماقدان چکینین. انسانی گرک کی باشقالاری داهی سانسین.........

2ـ اوخوجو البته کی بیر شعری اوخویاراق اوز دوشوندوگون آلیر.

3-سن جامه شناسی اوخودوقدا من چوخ تاسف ائدیره م کی هله کولتورلرین و میللتلرین بیر بیری له داورانیشینی و اساس نیازینن فرقینی نظره آلمیرسان.

4-اگر درجه بندی ائتسک گوره سن بو آغ آپاق قان شعری بیزم میللتین و یاخود بشرییه تین هانکی پرابلئمینی واجب اولاراق داشییر؟

5- بونو بیله بیله کی هجویات شعرین هئچ بیر کونجه ده دئییل یئنه اوز یازدیغینا توجیه یازیرسان.

6-بیزیم اوزموزون سنین اوزونون و اذربایجان میللتینین و حتی دونیا انسانلارینین او قدر یازماقا پرابلئملری وارکی یازماقنان بیتن دئییل

7-بیز اوزموزوک و اوزموزوده باشقالارینا بنزتمک ایسته میریک. (نیچه دئییرلر کی گوت وئره ن ایمیش. مگر اونون داوامچیلاری گوت وئره ن اولمالیدیرلار؟)

8- سن نیه ایشین موشکوله دوشنده باشقالارینی اجتماعی ساوادسیزلیقلا متهم ائدیرسن؟ اوز ساوادینا فیکیر وئریرسن می هئچ؟البتده اوزونو اوستون بیلنلرین بیلینکی شخصییت موشکولووار: کانت.

رامین جهانگیرزاده:

حؤرمتلی اسماعیل خرمی جنابلاری

Üryanlığımız bizim ilk üsyanımız olacaq

:: Ağ- apbaq qan - "Qonşuda sevişən\ Qadınla kişinin səsi!,\ Sevişməyin eşitmək həvəsi!,\ Barmaqlarımın arasında istəkan!,\ İstəkana dayadığım qulaq!,\ Həvəslərin dalğalanan nəfəsi!,\ Beynimdə fırlanan ferkanslar!,\ Damarlarıma gələn isti qan!,\ məndə həyəcan yaratdı bir an…!\ Balacamı yuxudan oyatdı…\ Oyandı, dikəldi\ Zillədi gözlərimə gözünü…!\ Bu həyəcana son qoymaq gərək\ Yoxsa bu həyəcan;\ İçimdə nə var,\ Hər nəyimi dağıdar.\ Silahlandim…\ Başladım boğmağa,\ Sağ əlimlə,\ Üsyankar balacamı.\ Ax…!\ Öldürdüm\ Öldü…!\ Və ölərkən əllərimdə\ Ağ-apbaq qanı çıxdı, töküldü…!"

Bu yazının üstündə çöxlu dartışmalar oldu və bu dartışmalar əsasən yazının erotik olduğundan baş verdi. Yazıda gedən əhvalat bir – neçəsinin acığına gəlsə də, bir neçəsinin xoşuna gəldi. insanda maraqlanma həvəsi, onu bu dartışmalara sarı yönəltdi. Kimisi – bu yazıdan heç bir şey anlamadıq – dedi. Kimisi bu yazıya fılan adı qoymağı uyğun bildi. Kimisi clasick ədəbiyyatın oxumağını təklif etdi. Kimisi yaman – yozla içində olan nifrətlərini bilindirmək istədi. Elə bilki bunların xisusi hərimlərinə təcavuz etmiş bir adam kimi oldum. Mən yalnız özümə qarşı olaraq üsyan qaldırdım və heç bir kəsin xisusi həriminə təcavuz etmədim. Yalnız cəsarətin qapısını açmaq niyyətiylə yazdım bu yazını yoxsa nə işim variydi ki özümə qarşı çıxam.

əsas sözün nə olduğudur. Oxucunun nə istədiyi önəmli deyil. əsas oxucunu özünə qaytarmaqdır. əsas toplumda gedən əhvalatdır. Tanrı biz insanları üryan yaratdı, bəs niyə üryan yazılar yaradanda diskinirik?!…

insan üsyankar olmaq üçün maskasını götürməlidir. Üryanlığımız bizim ilk üsyanımız olacaq. Riyakarlıq və adımızın kölgəsində yaşamaqla heç bir dəyişikliklər edə bilmərik. Cəsarəti olmayan yazıçının yazısı heç bir önəmli təsir bağışlaya bilməz. Hər nədən öncə yazıçı öz əleyhinə qarşı üsyan qaldırmalıdır. Heç nədən çəkinməməlidir.

Özümüzü yasaqlayıb sansor ediriksə bizi yasaqlayıb sansor edənlərə bir iş görə bilmərik. Hər nəyi özümüzdən başlamalıyıq. Nədən çəkinirik?! Niyə adlarımızın kölgəsində yaşayıb onları qoruyuruq?!…

Yazılarında özlərini insan şəklində göstərən yazıçılar bir neçə adamın baxışında özlərinə insanlıq vəsiqəsi qazansalar da ancaq öz vicdanlarının qarşısında bu insalığın qondarma olmağını düşünəcəklər.

İnsanlığa düşünmək, insanları sevmək, sevmək və yenə də sevməkdir.

Sevmək nə deməkdir?!… sevmək erotik yazılara qarşı çıxmaqdırmı?!… içimizdə olan erotik iztirablarımızı düşünmüşükmü?!…

Bütün həyəcanlarımız bu anlarda yaranır… ürəyimiz döyünür… yasaqlanmış erotiklərimizi qonşuda gələn erotik səslərdə axtarırıq, budur bizim toplumda insanlarımızın yasaqlanmış durumu. Toplumda baş verən əhvalatı yaxşı düşünsək erotik bu yazının nə olduğunu yaxşıcasına duymaq olar.

İnsan, insan olmaq üçün çalışırsa, insanlığı unudub insansızlıq yolu ilə insanlıq qazanmaqla insan ola bilməz.

عوریان­لیغیمیز بیزیم ایلک عوصیانیمیز اولاجاق

:: آغ ـ آپباق قان - «قونشودا سئویشن/ قادینلا کیشی­نین سسی!،/ سئویشمه­یین ائشیتمک هوسی!،/ بارماقلاریمین آراسیندا ایستکان!،/ ایستکانا دایادیغیم قولاق!،/ هوسلرین دالغالانان نفسی!،/ بئینیمده فیرلانان فئرکانسلار!،/ دامارلاریما گلن ایستی قان!،/ منده هیجان یاراتدی بیر آن…!/ بالاجامی یوخودان اویاتدی…/ اویاندی، دیکلدی/ زیلله­دی گؤزلریمه گؤزونو …!/ بو هیجانا سون قویماق گرک/ یوخسا بو هیجان؛/ ایچیمده نه وار،/ هر نه­ییمی داغیدار./ سیلاحلاندیم…/ باشلادیم بوغماغا،/ ساغ الیمله،/ عوصیانکار بالاجامی./ آخ…!/ اؤلدوردوم/ اؤلدو…!/ و اؤلرکن اللریمده/ آغ -آپباق قانی چیخدی، تؤکولدو…!»

بو یازی­نین اوستونده چؤخلو دارتیشمالار اولدو و بو دارتیشمالار اساسن یازی­نین ائروتیک اولدوغوندان باش وئردی. یازیدا گئدن احوالات بیر – نئچه­سی­نین آجیغینا گلسه ده، بیر نئچه­سی­نین خوشونا گلدی. اینساندا ماراقلانما هوسی، اونو بو دارتیشمالارا ساری یؤنلتدی. کیمیسی - بو یازیدان هئچ بیر شئی آنلامادیق - دئدی. کیمیسی بو یازییا فیلان آدی قویماغی اویغون بیلدی. کیمیسی کلاسیک ادبیاتین اوخوماغینی تکلیف ائتدی. کیمیسی یامان - یوزلا ایچینده اولان نیفرت­لرینی بیلیندیرمک ایسته­دی. ائله بیل­کی بونلارین خیصوصی حریم­لرینه تجاووز ائتمیش بیر آدام کیمی اولدوم. من یالنیز اؤزومه قارشی اولاراق عوصیان قالدیردیم و هئچ بیر کسین خیصوصی حریمینه تجاووز ائتمه­دیم. یالنیز جسارتین قاپیسینی آچماق نیتییله یازدیم بو یازینی. یوخسا نه ایشیم وارییدی کی اؤزومه قارشی چیخام.

اساس سؤزون نه اولدوغودور. اوخوجونون نه ایسته­دییی اؤنم­لی دئییل. اساس اوخوجونو اؤزونه قایتارماقدیر. اساس توپلومدا گئدن احوالاتدیر. تانری بیز اینسانلاری عوریان یاراتدی، بس نییه عوریان یازیلار یاراداندا دیسکینیریک؟!…

اینسان عوصیانکار اولماق اوچون ماسکاسینی گؤتورمه­لی­دیر. عوریان­لیغیمیز بیزیم ایلک عوصیانیمیز اولاجاق. ریاکارلیق و آدیمیزین کؤلگه­سینده یاشاماقلا هئچ بیر دییشیک­لیک­لر ائده بیلمه­ریک. جسارتی اولمایان یازیچی­نین یازیسی هئچ بیر اؤنملی تاثیر باغیشلایا بیلمز. هر نه­دن اؤنجه یازیچی اؤز علئیهینه قارشی عوصیان قالدیرمالی­دیر. هئچ نه­دن چکینمه­مه­لی­دیر.

اؤزوموزو یاساقلاییب سانسور ائدیریکسه بیزی یاساقلاییب سانسور ائدن­لره بیر ایش گؤره بیلمه­ریک. هر نه­یی اؤزوموزدن باشلامالی­ییق. نه­دن چکینیریک؟! نییه آدلاریمیزین کؤلگه­سینده یاشاییب اونلاری قورویوروق؟!…

یازیلاریندا اؤزلرینی اینسان شکلینده گؤسترن یازیچی­لار بیر نئچه آدامین باخیشیندا اؤزلرینه اینسانلیق وثیقه­سی قازانسالار دا آنجاق اؤز ویجدانلاری­نین قارشیسیندا بو اینسالیغین قوندارما اولماغینی دوشونه جکلر.

اینسانلیغا دوشونمک، اینسانلاری سئومک، سئومک و یئنه ده سئومکدیر.

سئومک نه دئمکدیر؟!… سئومک ائروتیک یازیلارا قارشی چیخماقدیرمی؟!… ایچیمیزده اولان ائروتیک ایضطیراب­لاریمیزی دوشونموشوکمو؟!…

بوتون هیجانلاریمیز بو آنلاردا یارانیر… اوره­ییمیز دؤیونور… یاساقلانمیش ائروتیک­لریمیزی قونشودا گلن ائروتیک سسلرده آختاریریق، بودور بیزیم توپلومدا اینسانلاریمیزین یاساقلانمیش دورومو. توپلومدا باش وئرن احوالاتی یاخشی دوشونسک ائروتیک بو یازی­نین نه اولدوغونو یاخشیجاسینا دویماق اولار.

اینسان، اینسان اولماق اوچون چالیشیرسا، اینسانلیغی اونودوب اینسانسیزلیق یولو ایله اینسانلیق قازانماقلا اینسان اولا بیلمز.