اوراسیندان دئدین یئنه قولاغیم دیسکیندی
اؤزونو ان گوجلو یازیچی حساب ائدنده، بعضاً یازیقلیغیم گلیر سنه. یازیلارینی بیر سیرایا قویوب، اوخویورام. توخودوغون سطیرلرده کلمهلرین یازیق اولدوغونو آنلاییرام. نه دئمک ایستهدییینی، بیلمهسم ده، ائله ظن ائدیرم کی، هئچ اؤزون ده بیلمیرسن. بالام دئییب بال آختاریرسان، پتکسیز آنلارینا.
بوراسی اؤنملی دئییل، اوراسی اؤنملیدیر. بیر آز گئری قاییتسان، هر نهیی آنلاییب، اوراسیندان یازدیغیمین فلسفهسینی بیلرکن، داها کؤهنه تهیر کیمی دؤر گؤتورمزسن فیلان کس جنابلاری!
ایندی سنی یاخشیجاسینا باشا سالماق ایستهییر، آدلاندیردیغین بو اوغلان شاعیر. اوراسیندان دئدین یئنه قولاغیم دیسکیندی، ایستکانی گؤتوروب دایادیم یازیلارینا. آی برکاننا! دییهسن سنین ده یازیلاریندان ائروتیزم اییسی گلیر. قولاغیم سولاندی! زورلا اؤزومو ساخلادیم. البتده سیز فیلان کس جنابلاری، منیم ایلانیمین معصوم اولدوغونو دانا بیلمزسیز، چونکو من یاخشی یادینیزدا اولسا مجمئیی جیراندا هر نهیی دوزگون ایضاح ائتمیشم. بو کورامال ایلان هئچ کیمی زهرلمهییبدیر. بیلیرم کی سیز بونو تام آنلاییرسیز.
کئچک اوراسینا، بیر آز فیلاش ـ میلاش وور قاییداق دالی. اوراداکی، اوراسینا گؤره، تاریخلر یارانیر، ایللر بویو موحاریبه گئدیر، یوز مینلر و یا حتّی میلیونلار اینسان قیریلیر…! سیز بو قدر اینسانلارین جانینی آلان، اونلاری مین درده سالان اوراسینی بوش توتا بیلمزسیز. حیاتیمیز بو لامصب یوز گیرمین اوستونده فیرلانیر. باشیمیز گیجهلیر، گؤزلریمیز چؤیرولور. بو یوز گیرمین اوستونده نهلرکی باشیمیزا گلمهییب و گلهجک ده؟!! ایندی من یازیغا بیر ایستکانی دا چوخ گؤرورسوز؟!! البتده باشقالارینا دئمیشدیم و سیزه ده دئییرم، آغاپباق قانیما باخمایین، قانیمی شوشهیه توتساز قاپقارا قان گؤرهجکسیز.
آ کیشی! یئنه منیم قانیمی شوشهیه توتمایین لوطفن! بو قدر قاپقارا قان آخیدیلیب، آغاپباق قانین اوستونده، ایندی گلیب منه شیخ اولوبسوز؟!! هر نه اولورسوز اولون، آنجاق کیمسهیه ساتقین آدی قویوب بیانیه وئررکن، اؤز ساتقینلیغینیزی اوست ـ باستیر ائده بیلمزسیز فیلان کس جنابلاری…! ساتقین او آدامدیر کی اؤزونه گؤره هر نهیی قوربان وئرمک ایستهییر. ایندی سیز فیلان کس جنابلاری بیر تیکه آدینیزدان اؤترو بوتون قاباغینیزدا دایانان آدلاری ساتقین آدلاندیرماق ایستهییرسیز؟!! اوراداکی جاندان-باشدان ایشلهینلره شبهده بزهییب، اؤزونوزو هر نهیییله بزهییرسیز.
نمنمنهنیزی بزهییرسیز، بزهیین! آنجاق منیم نمنمنمله ایشینیز اولماسین، یوخسا نمنمنهمی الیمه آلیب یئنه ورگانی سویا وئررم. یا سنه وئرن آللاه، یا منه وئرن آللاه…!
Orasından dedin yenə qulağım diskindi
Özünü ən güclü yazıçı hesab edəndə, bəzən yazıqlığım gəlir sənə. Yazılarını bir sıraya qoyub, oxuyuram. Toxuduğun sətirlərdə kəlmələrin yazıq olduğunu anlayıram. Nə demək istədiyini, bilməsəm də, elə zənn edirəm ki, heç özün də bilmirsən. Balam deyib bal axtarırsan, pətəksiz anlarına.
Burası önəmli deyil, orası önəmlidir. Bir az geri qayıtsan, hər nəyi anlayıb, orasından yazdığımın fəlsəfəsini bilərkən, daha köhnə təyər kimi dör götürməzsən filan kəs cənabları!
İndi səni yaxşıcasına başa salmaq istəyir, adlandırdığın bu oğlan şair. Orasından dedin yenə qulağım diskindi, istəkanı götürüb dayadım yazılarına. Ay bərəkanna! Diyəsən sənin də yazılarından erotizm iysi gəlir. Qulağım sulandı! Zorla özümü saxladım. əlbətdə siz filan kəs cənabları, mənim ilanımın məsum olduğunu dana bilməzsiz, çünkü mən yaxşı yadınızda olsa məcmeyi cıranda hər nəyi düzgün izah etmişəm. Bu koramal ilan heç kimi zəhərləməyibdir. Bilirəm ki siz bunu tam anlayırsız.
Keçək orasına, bir az filaş-milaş vur qayıdaq dalı. Oradakı, orasına görə, tarixlər yaranır, illər boyu muharibə gedir, yüz minlər və ya hətta milyonlar insan qırılır…! Siz bu qədər insanların canını alan, onları min dərdə salan orasını boş tuta bilməzsiz. Həyatımız bu laməssəb yüz girəmin üstündə fırlanır. Başımız gicəlir, gözlərimiz çöyrülür. Bu yüz girəmin üstündə nələrki başımıza gəlməyib və gələcək də?!! İndi mən yazığa bir istəkanı da çox görürsüz?!! əlbətdə başqalarına demişdim və sizə də deyirəm, ağapbaq qanıma baxmayın, qanımı şüşəyə tutsaz qapqara qan görəcəksiz.
A kişi! yenə mənim qanımı şüşəyə tutmayın lütfən! Bu qədər qapqara qan axıdılıb, ağapbaq qanın üstündə, indi gəlib mənə şıx olubsuz?!! Hər nə olursuz olun, ancaq kimsəyə satqın adı qoyub bəyaniyyə verərkən, öz satqınlığınızı üst-bastır edə bilməzsənfilan kəs cənabları…! Satqın o adamdır kı özünə görə hər nəyi qurban vermək istəyir. İndi siz filan kəs cənabları bir tikə adınızdan ötrü bütün qabağında dayanan adları satqın adlandırmaq istəyirsiz?!! Oradakı candan-başdan işləyənlərə şəbədə bəzəyib, özünüzü hər nəyiylə bəzəyirsiz.
Nəmnəmənəzi bəzəyirsiz, bəzəyin! Ancaq mənim nəmnəmənəmlə işiniz olmasın, yoxsa nəmnəmənəmi əlimə alıb yenə vərganı suya verərəm. Ya sənə verən allah, ya mənə verən allah…!
Atlar gözəldir at adamlardan
Ətini ətimə qat